【Viu】滙豐保險呈獻舞台劇《香港式離婚》，今日舉行記者會公布演員陣容，舞台劇界「神級夢幻組合」黃子華、劉嘉玲破天荒首度合作，仲有楊淇、「蝦頭」楊詩敏、梁浩邦等！子華神孖嘉玲姐先喺記招台上唇槍舌劍，精彩程度5**！
子華神直言今次搵嘉玲姐合作，係獲得神嘅提示，更即席生動演繹成件事嘅來龍去脈！嘉玲姐話考慮咗好耐先應承，謙稱怕拖累團隊，最後係子華神出盡牙力說服：「呢世人未試過咁用力去sell！」而經過首次圍讀後，子華神更確立嘉玲姐就係「對的人」，搞到嘉玲姐都忍唔住大嗌有壓力！
二人劇中飾演專搞離婚嘅律師，幫人離婚同時，呢兩公婆亦有離婚嘅暗湧，不過佢哋話喺劇中冇歇斯底里嘅嘈交，所有嘢都係好優雅！子華神再爆入面仲會有「鹹濕」嘅元素，嘉玲姐搶話：「我肯定內心想鹹濕佢！」未開始排練就已經咁刺激？舞台劇現暫定40場，唔知有冇機會加場，打破演《最後禮物》嘅50場？演出消息一公開，兩位即周身飛債？
楊淇、楊詩敏、梁浩邦異口同聲話對住子華神同嘉玲姐都超緊張，喺圍讀嗰陣更係連望都唔敢望「神級夢幻組合」！其中楊淇喺2015年公演嘅《香港式離婚》都有演出，二度飾演同一角色「Emily」，佢又有啲咩新嘅感受？蝦頭呢次喺劇中係「情感濃烈」擔當，對編劇搵佢演一名高貴優雅嘅闊太，蝦頭表示勁興奮，係一個大挑戰咁話！
