【Viu】鄭中基的《Fragments of Wonder 鄭中基世界巡迴演唱會2023》澳門站噚晚尾場，Ronald繼續大展歌喉！一出場先唱第一首派嘅廣東歌《搬屋》，同fans嚟個回憶殺！再嚟就係《想愛你》，想知啲fans有幾冧？Ronald每唱完一首歌，全場即拍爛手掌兼歡呼，又有fans向佢示愛，真係要講句「大佬好嘢」！
由台灣出道嘅Ronald就當然準備咗國語歌送畀fans啦，包括《你的眼睛背叛我的心》同《絕口不提愛你》！而去到演唱會尾聲，佢揚言呢次tour係冇encore環節，當下搞到啲fans鬼咁失望！但Ronald唱完最後一首歌《My Only One》後即嚟encore環節，更應fans要求唱《死啦啲青春痘》、《龍咁威》、《時間人物地點》，開心死班fans！而到場睇騷嘅有Ronald爸爸、老婆余思敏同對仔女、毛舜筠、何爵天、潘紹聰、胡耀料、田啟文等。
