【Viu】林家謙《Summer Blues 演唱會》噚晚嚟到第五場，有Joyce鄭欣宜助陣合唱《救命歌》，佢話要多謝家謙寫咗好多歌俾佢唱，講到眼濕濕，暖男家謙即時攬攬呵返，「我當時去緊日本旅行，收到你打電話來喊，我也重以為自己做錯咩事，嚇死我....」欣宜喊住:「你首歌好似有一個人摸住我個頭，呵住我咁。」除咗口講多謝，Joyce都有準備小小心意㗎，佢送上「增高鞋墊」，希望以後開騷都似個鞋墊咁，不停加場再加場呀！呢晚嘅嘉賓除咗Joyce之外，仲繼續有Serrini、Yoyo岑寧兒，佢仲請到Ronald鄭中基一齊合唱《閉目入神》同《My only one》，Ronald送上月餅做禮物，又自爆囡囡都是家謙fans，「我出番來唱歌，因為我個女，我出番來寫歌，就係因為你林家謙。」所以佢預告今年先會做碟，又邀請家謙同佢一齊寫歌添！
