再厲害嘅手機，都有無電嘅一刻！各手機廠都研究，點樣令部手機可以內置電量更多嘅電池，同埋快啲叉滿電。小米趁世界行動通訊大會 (MWC)舉行期間，又示範最新叉電技術，將有線充電推到300W嘅新境界，再次改寫紀錄。
根據官方提供嘅實測影片，一部內建 4,100mAh 電池嘅「魔改版」Redmi Note 12 Pro+，插上叉電火牛後，只用2分12秒就叉到50%。另外，小米實測展示充電功率可突破290W，280W功率亦可以持續長達兩分鐘。在接近5分鐘時，手機已完全叉滿電。呢個速度比目前已上市嘅高功率叉電方案速度快咗幾乎一倍。
小米話，為咗達到呢個超高功率，佢哋用咗15C嘅超高倍率電芯和新嘅「三文治」堆疊方案。電池中導入新嘅硬碳材料，替代部分石墨，透過特定比例混合而成嘅硬碳加石墨混合負極，能在兼顧高能量密度嘅同時，提供更快嘅反應速度。而由上下兩片超薄電芯和中間散熱材料組成嘅「三文治」結構，能實現更強嘅散熱和更高嘅空間利用率。
值得一提，呢套方案搭配嘅300W GaN充電器，體積上和小米之前嘅 210W 叉電火牛幾乎相同。平面變壓器採用咗整合程度更高嘅模組化設計，又增加咗大面積石墨烯來輔助散熱。
目前已量產W數最高嘅手機充電方案，係realme GT Neo5(內地版)，即國際版嘅GT3，手機使用佢哋240W SuperVOOC快充，可以9分鐘就叉滿電話。小米今次300W充電方案更進取，目前小米未有透露任何大規模生產及相應電話嘅消息，今次示範宣示公司領先技術意味甚濃，要看到產品賣街，大家仲要等等。
資料來源：小米
