【Now Sports】英格蘭對墨西哥的16強比賽，雖然不及挪威對巴西的一場好睇，但論戲劇性及緊張程度，這一場更勝一籌。結果愛隊在人少打人多情況下，最後頂得住主隊狂攻，晉級8強。
撰文：Jansen（英格蘭擁躉）
一開波，一如我上篇【躉我講隊波】所料，墨西哥既有主場氣勢，一定唔會只顧龜縮防守，而會主動控球進攻，上半場大部份時間也是如此走勢，魯爾占美利斯更有一球靚頭鎚要佐敦碧福特（Jordan Pickford）神救。
不過來到後半段時間，英格蘭罕有一次右路攻勢薩卡傳中，比寧咸後上捕到靚位一頂入網。中圈開波後，英軍把握墨西哥球員突然失魂，艾利亞治安達臣和哥頓迫搶成功，再由隊長哈利簡尼靚傳予比寧咸梅開二度。
英軍突然之間領先兩球，相信球隊上下包括領隊杜曹也預料不到。惟墨西哥沒有因此打沉，4分鐘後火速追成1:2，在完半場前數分鐘更不斷狂攻，碧福特再次要高飛低撲救全家，守住1球領先優勢入更衣室。
下半場比上半場更具戲劇性，1張紅牌、兩個12碼……如果要詳細寫，可能要寫千字文先得，包括昆沙那球飛剷是否需要直紅？簡尼在己方禁區那球出腳解圍值唔值得被罰12碼？……但無論如何，英格蘭總算力抵墨西哥最後半小時狂攻，驚濤駭浪下淘汰對手。
我要特別表揚門將碧福特，除了有多球神救，面對墨西哥九九八十一斬毫無懼色，出迎接波打手鎚零失誤；就連之前踢得頗差的史賓斯，今仗後備上陣表現亦不錯。總之全隊在打少一個的劣勢下，人人決心走多一步，終於讓我見到愛隊的防守紀律，實在倍感安慰。而墨西哥只識一味斬波，面對英軍大條道理泊大巴顯得老鼠拉龜，控球權已畀晒你哋，破唔到密集都無計。
40年前，英格蘭曾在墨西哥這個阿茲迪球場，於世界盃8強輸給阿根廷馬勒當拿上帝之手；40年後今天，新一代英軍終於可以昂然步出同一個球場，帶著甜美的勝利，準備迎戰下一輪對手挪威，期待兩大神鋒簡尼與賀蘭對決！
撰文：Jansen
前音樂雜誌《mcb》作者，現開設了「字裡知音人」樂評網站。愛音樂，亦愛足球。音樂口味非常大愛，會聆聽及Respect不同音樂類別；足球就十分專一，只捧曼聯和英格蘭。
【躉我講隊波】由列強擁躉在每場比賽後講愛隊。
