【Now Sports】香港滑浪風帆隊今日舉行出征巴黎奧運的記招，2名港隊奧運代表均於席上，分享備戰情況及征奧目標。
香港滑浪風帆隊連同今屆已經是連續9屆獲得一男一女的奧運席位，此趟征戰巴黎是首戰奧運的鄭清然及馬君正，二人將出戰由RS:X轉為新板種的iQFOiL的滑浪風帆項目，而且賽制有變，若強風將以傳統模式如繞圈賽及馬拉松賽比賽，相反若風勢較弱則以4分鐘競速迴轉賽（Sprint Slalom）速戰速決，巴黎風帆項目於7月28日展開。
26歲的馬君正受訪時談及備戰狀況：「噚晚先喺馬賽返嚟香港，留咗喺嗰邊一個半月，主要係視察環境同風向，而嗰邊就咩風都有，如果難度10分滿分咁會有9分，因為個多樣性好高。」不過她直言「大膽」是她征奧的優勢：「今次第一次去奧運都係好期待同興奮，我覺得大膽果斷係我嘅優勢，我係比起其他女性運動員更加大膽，之前試過練習嗰陣發生意外，即使塊面縫咗17針，都無放棄呢個運動，繼續向前。」
「大頭妹」笑言自己身負長洲人的使命：「由珊珊（李麗珊）攞金牌嗰年，就知佢好犀利，想跟隨佢嘅步伐。爸爸同我講過要記住自己係長洲人，長洲有前人創造過奇蹟，對自己要有信心。」
至於24歲的鄭清然受訪時一直不斷搓弄雙手，並坦言自己無比緊張：「好緊張呀，仲有20幾日，時間唔多但好似仲有啲嘢要調整咁，雖然每次都好緊張但最後又表現到應有水準，只係可能有時自己有啲運先可以做到，反而如果自己唔緊張，可能代表唔在意比賽，所以緊張都係一件好事嚟。」他同時感謝體院的運動心理學家：「兩年前就開始幫我哋，佢好了解自己會緊張，亦多謝佢教識我點樣處理壓力同緊張，我依加都會同多啲朋友傾計，從而令自己可以放鬆啲。」
該名港將談及今趟奧運的目標：「之前試過唔記得戴比賽用嘅手錶，比賽成日準備得唔好，好多甩漏，所以今次除咗成績之外，希望做好晒自己應該要準備嘅嘢同本份，唔想成日要啲師姐同教練去backup我，而且奧運係成長嘅里程碑，能夠達到我嘅目標就係一次嘅成長。」
教練陳敬然形容新賽制充滿變數：「睇返呢幾年嘅比賽，第10名都可以最後變第1名，所以我哋希望入到頭10先，只要入到前10名就咩都可以發生；加埋當地7、8月嘅風向好似有數得計，一個禮拜入面有4日半係細風，至少有1日係大風。因為新賽制新板種有好多變數，大家都由零起步，有危就有機，期待我哋嘅表現啦。」