【now.com體育】球場內鬼死咁嘈,所以成日見啲教練同球員「咬耳仔」,因為咁先聽得清楚講啲咩,以免傳達錯誤信息。周中歐聯賽事,「紅魔鬼」曼聯在比賽最後5分鐘,戲劇地連入2球,作客2:1反勝「老婦人」祖雲達斯,賽後紅魔教頭摩連奴固然風騷,走到球場中間「兜著耳仔」、「嘴戚戚」,希望聽清楚祖記球迷仲有咩嘢講,舉動充滿挑釁意味。
撰文:盧永義
摩連奴「狂人」這個稱號絕非浪得虛名,夠膽在老婦人主場4萬多名球迷面前挑機,隨即惹來祖雲達斯球員邦路斯、保羅戴巴拿等上前抗議,最後要曼聯隊長艾舒利楊格調停,並由職員護送離開。「狂人」賽後就話,因為在場內被球迷罵了90分鐘,而且侮辱家人及前執教球會國際米蘭,才做出此舉反擊。不少紅魔迷見「串王」強勢回歸,紛紛讚好,更有網民希望足球遊戲商能加入「戚嘴兜耳」為入球慶祝動作。
無疑,摩佬今年開季「脫閘」,自然受了很大壓力,今次家人被侮辱使他向球迷反擊。不過,與球迷樹敵並非明智,一來拖低自己及球會聲譽,二來只會招來更大攻擊,更何況身為專業領隊,摩佬應好好管理情緒,而且,筆者不敢苟同摩佬「輸打贏要」的態度。
早前曼聯作客2:2賽和車路士,摩佬完場前與藍軍教職員發生摩擦,賽後更在史丹福橋球場高舉3隻手指,表示自己帶領車路士拿下3屆英超冠軍。其後歐聯賽事,主場0:1不敵祖雲達斯,賽後亦向球迷豎起3隻手指,表示帶領國際米蘭成為3冠王,認為球迷應該尊重他。
作為中立球迷,筆者認為摩佬同時亦應尊重球迷對他的不滿。相比之下,筆者較欣賞同市死敵曼城領隊哥迪奧拿,2名教練同樣執掌億萬大軍,但在買人及球隊戰術方面大有不同,與球員、球迷以至傳媒的關係管理亦有天淵之別。嚟緊周日英超重頭戲曼市打吡,即管看看2名領隊發揮如何。
本欄逢星期五上載
作者簡介:盧永義(102),運動及數字愛好者,熱愛足球,為業餘專欄作家,冀以風趣生動方式分享體育之樂。
電郵:102talksport@gmail.com