【A&M Diary】
中國有八大菜系：川菜、魯菜、粵菜、蘇菜、浙菜、閩菜、湘菜和徽菜，但數嚟數去都無滇菜（雲南菜）嘅，唔通滇菜真係得米線？其實雲南屬於中國西南地區嘅盆地，所以氣候温和，雨量充足，物種豐饒，而滇菜講究鮮嫩，選材以山珍菇菌為主，主打養生嘅原 食材！至於喺香港食傳統雲南菜嘅選擇不多，而更引入各種香港少見嘅雲南特產作食材嘅太古城阿詩瑪，就係我哋嘅推介喇！
阿詩瑪：雲南過橋米線
食雲南菜又點可以無米線呢！其中過橋米線可以話係雲南嘅特色：阿詩瑪嘅店員會先上一碗裝滿滾湯嘅大碗，再即時放入米線、薄豬肉片、薄雞肉片、菜等配料，所有食物都好新鮮！滾湯令米線越煮越入味，而且食到尾仲夠熱辣辣呢！米線爽口細滑，湯底鮮甜，雞味濃郁，仲可以自行加入酸菜，令味道更多層次。
阿詩瑪：冰鎮黃金耳
雲南地形複雜，孕育咗唔同種類嘅野生食用菇菌，而嚟自雲南大理沙溪嘅金耳素有「植物燕窩」、「菌中燕窩」之稱，健身養生之餘，口感Q彈又有嚼勁，冰鎮嘅食法加上wasabi同豉油，非常清新醒胃。
阿詩瑪：金獎涼白肉
蒜泥白肉肥而不膩，五花腩肥瘦相間，入口非常軟綿，加埋墊底嘅青瓜絲一齊食，口感更豐富！
