【Viu】田啟文（田雞）、Jennifer余香凝、劉冠廷同許承傑導演今日出席《雙囍》首映禮，講到田雞同Jennifer喺戲中飾演父女，原來冠廷一度懷疑過係咪親生，Jennifer識做笑認靚樣似爸爸，身高就似媽媽，搞到田雞一時感懷身世，自爆那些年因為生得似外國人而一度獲有錢人想收養，點知老竇唔肯賣仔，搞到自己細個要捱鹹苦！
對於《雙囍》喺台灣叫好叫座，三位都對香港票房有信心，田雞仲笑言希望《夜王》漏少少畀《雙囍》就好喇！講到Jennifer獲封「國民新娘」，佢笑認係成世人得到最多讚美嘅一次，仲話有好多台灣觀眾高呼想娶佢，可惜自己結咗婚喇！而冠廷就好鬼馬，喺田雞瞓覺時拎領呔扮柯南影黑圖，仲話如果田雞肯帶自己去見星爺，就算要打翻都肯呀！
