【A&M Diary】以前講起食齋，都會等同於無嚟味道。但近年多咗人關注健康，開始從飲食著手，就算無任何宗教信仰，都開始成為素食者或指定日期素食者。所以令素食餐廳更普及，亦多咗好多主題嘅素食餐廳。其中包括以素食Cafe作主打，位於深水埗嘅素年。素年以新鮮嘅食材，推出不同嘅創意菜式，碟碟都可以相機食先，令素食年輕化，更讓素年成為人氣極高嘅素食餐廳。
素年：香芋蕃薯波波
素年嘅名物，包括呢個自家製嘅香芋蕃薯波波！咬開香脆嘅外皮，入面係融為一體嘅香芋蓉同蕃薯泥，外脆內軟，口感軟糯煙韌而甜度適中，非常開胃。
素年：炸魷魚圈配自家製香辣甜酸醬
素年都有肉食？幾可亂真嘅炸魷魚圈，同樣即叫即炸，喺薄薄嘅炸粉之下，竟然深藏魷魚嘅Q彈口感！配合素年自家製甜酸醬一齊食，夠晒惹味。
素年：台式藥膳餃子稻庭烏冬定食
以素食為主打嘅素年，亦相當支持新鮮嘅本地菜。用上口感軟綿嘅本地南瓜同蕃薯；以本地時菜製作嘅一口餃子，所有食材都非常新鮮。至於稻庭烏冬口感滑溜，估唔到以藥膳為湯底，又出奇地夾，更增添營養同層次呢！
素年：六種野菌黑松露忌廉燴意大利飯
用上猴頭菇、白菌、雞髀菇、大啡菇、秀珍菇等野菌，就知道菇味係幾咁濃郁啦！大啡菇被切成條狀，令菇香味更易散發；切粒嘅白菌同雞髀菇融入咗意大利飯當中，為意大利飯增添質感。另外，素年嘅意大利飯同樣以忌廉為主調，加上濃郁味道見稱嘅黑松露醬，令味道陪速昇華！而蘆筍嘅存在則為味蕾喺帶來一點清新感覺，避免舌頭喺菇海當中遇溺。
