【A&M Diary】入冬之後又點少得食火鍋呢！除咗麻辣火鍋，不如搞搞新意思，一於食返個芝士火鍋啦！位於屯門嘅意粉狂熱，近期以濃郁嘅芝士火鍋做賣點，啖啖都掛滿芝士香氣，賣相吸引，層次感十足，對於呢份芝士嘅誘惑，作為芝士控又點可以錯過呢！
特色芝士火鍋
當店員點起火，慢煮嘅過程，令芝士嘅鹹香，越煮越香濃。先將香草雞肉放入芝士火鍋當中，滑嫩嘅雞肉融合咗芝士，食嘅時候感受到香草同芝士嘅層次感；另外，芝士嘅鹹香配上鮮甜嘅青口，極端嘅對比，令味道更突出；最後可以將意粉混入芝士火鍋當中，索晒芝士嘅精華，夠晒creamy。
香烤黑安格斯西冷牛扒
西冷牛扒用上熱石承載，除咗熱力更均勻之外，牛扒嘅生熟度亦可以隨心所欲。西冷牛扒肉味香濃，肉質結實但不會太韌，所有嘢都啱啱好！
自家製提拉米蘇
外層滿滿嘅咖啡粉同埋奶油霜，包裹住嘅係浸過濃縮咖啡嘅手指餅。外層嘅甜味瞬即被一湧而出嘅咖啡味掩蓋，每一口都好似徘徊在似苦又甜之間。
