【A&M Diary】以前仲係學生，嚟到葵芳就梗係要去葵涌廣場掃街啦！但當年紀越嚟越大，好似同葵廣有種格格不入嘅感覺，如果想好好地坐低食餐飯，原來仁芳街食肆林立，當中不乏一啲臥虎藏龍嘅小食店。今次嚟到稻田食堂，餐廳主打日本菜同和風便當，價錢親民實惠，份量十足，非常抵食。
特選燒物盛
特選燒物盛有椒鹽珍寶牛舌串、鹽燒雞肉大蔥串、炭燒雞肉串、蒲燒鰻魚串，每款各有兩串，即叫即做，夠晒新鮮熱辣。牛舌大大塊，以少少椒鹽吊味就已足夠，牛舌爽口彈牙，肉味香濃；另外，加上鰻魚汁嘅蒲燒鰻魚串就絕對無得輸，好味！
沖繩便當
沖繩便當包括吉列千層芝心豬扒、汁燒金菇牛肉、味付螺肉、咖喱飯同三款刺身，我仲特意將咖喱飯upgrade做鰹魚湯烏冬。烏冬食落滑溜，鰹魚湯湯底清香，魚味香濃；吉列豬扒炸到外脆內嫩，入面仲有拉絲芝士，令人回味無窮。
築地海鮮丼
海鮮丼有四款魚生，分別係油甘魚、吞拿魚、甜蝦同紋甲魷魚。魚生非常新鮮，特別鍾意魚油非常豐富嘅油甘魚，非常滿足。海鮮丼仲配有茶碗蒸同小食，咁就唔怕唔夠飽啦！
