【A&M Diary】襯依家天氣仲係比較清涼，我哋決定抓住冬天尾巴，去元朗拍拖踩單車。做完運動有啲餓，當然要補充體力同空虛嘅胃！還車嘅地點鄰近朗屏西鐵站，搵搵下就見到呢間門口相當搶眼嘅Rainbow Bistro，決定坐低試下，會唔會感受到「你的愛就像彩虹」？
焗蠔
我哋頭盤叫咗焗蠔，焗蠔用咗芝士同埋明太子作調味，兩個調味料嘅味道都非常有個性，但又非常配合，絕對唔會搶咗蠔嘅鮮甜，好鮮味嘅頭盤。
慢煮豬炒蘑菇
厚切嘅豬肉口感十足，慢煮後keep住肉汁，再配上秘製醬汁，畫龍點睛，十分惹味！配菜份量非常豐富，除咗有炒蘑菇之外，仲有車厘茄同四季豆，份量十足。
All day breakfast
依度嘅All day breakfast有煙三文魚、豬肉腸、煙肉、炒蛋、薯餅、沙律菜、蒜蓉包同焗豆，啱晒貪心嘅你呀。其中，薯餅新鮮炸起，卜卜脆，真係好滿足！
凍特濃朱古力 + 冷萃茶
凍特濃朱古力，一啲都唔會太膩，甜度適中，好滿足！另外，冷萃茶就好清新，絕對係解渴之選。
