【A&M Diary】呢排天氣時冷時熱，搞到胃口都麻麻，加上濕度高，最啱就係食川菜，夠開胃醒胃之餘，食返啲辣嘢仲可以驅吓寒去吓濕添！嚟到尖沙咀廣東道，除咗係shopping熱點，仲有唔少臥虎藏龍嘅餐廳，今日我哋就嚟到流尚坊嘅四川小店：川粵。川粵舖頭唔大，但嗰種川菜麻香味由踏入門口就感覺到！
呢度嘅午餐都有唔少嘅選擇，但係為食嘅我，就覺得呢個九宮格嘅四川小菜至尊套餐就吸引喇！因為呢個九宮格小菜，有齊多款四川美食，想咩都試少少就啱晒！
口水雞、麻辣魚皮及紅油抄手
雞肉肉質鮮嫩，魚皮爽脆而不靭，而抄手皮嘅厚薄恰到好處，配合餐廳所提供嘅醬汁真係想encore呀！
紅燒牛肉及蒜泥白肉
一個牛一個豬，但係肉味比一般坊間嘅川菜餐廳提供嘅嚟得濃厚。
涼拌萵筍同涼拌木耳
涼拌醬汁甜而唔算太辣，作為涼菜嘅呢兩個小食係啖啖肉之下提供清爽嘅感覺。
酸菜魚薯粉
酸菜湯底酸而不辣，魚片嫩滑，薯粉爽口彈牙。而且份量都唔少，啱晒大胃口嘅男仔。
