【A&M Diary】呢個可能係全港最靚又易行，睇維港景嘅行山路線！呢個唯美嘅維港景位於北角寶馬山嘅紅香爐峰，最高點係220米，上山嘅路線其實好多，但我哋直接喺寶馬山嘅隱蔽捷徑起步，20分鐘就上到山頂喇！天氣好嘅話，仲可以觀賞埋日落添！
提提你
1. 紅香爐峰爬升幅度同樓梯都比較少，但捷徑係碎沙石路，相對難行少少，所以大家記住要量力而為
2. 如果唔想行碎沙石路， 可以喺寶馬山嘅金馬馳督徑出發
3. 沿路無補給站同洗手間，大家記住要預備足夠嘅飲用水行山
4. 保持環境清潔，自己垃圾自己帶走，絕對唔可以破壞大自然環境
5. 如果諗住上山睇日落或夜景，沿途無街燈，所以大家記住自備電筒
前往紅香爐峰方法
1. 巴士：於銅鑼灣乘搭城巴25A或九巴108，喺寶馬山總站落車
2. 小巴：喺百德新街搭25號小巴，喺寶馬山總站落車
紅香爐峰捷徑起點：寶馬山道盡頭
今次我哋嘅起步點係位於寶馬山道嘅盡頭，喺大家嘅右手邊就係山徑嘅入口。落咗樓梯之後就會見到一個圓型出水口，大家過對面再跟左邊絲帶行，呢條就係紅香爐峰嘅捷徑。
紅香爐峰
沿路斜道低，樓梯少，部分路段草較茂密，有少少爆林感覺。最後，經過一堆大石頭，就會去到紅香爐峰。不過，呢度嘅觀景位置唔多，大家要小心。睇完靚景之後，就可以原路離開。
