【A&M Diary】位於港島嘅寶雲道除咗係大家熱門嘅郊遊同跑步路線，原來仲有一座建於1893年，但喺2019先重新被天文台發現嘅南子午石。究竟南子午石係有咩用途，位置又喺邊度，點解會咁神秘呢？我哋就同大家分享路線，了解一吓南子午石嘅前世今生。
提提你
1. 寶雲道係香港其中一條合家歡，難度唔高嘅路線，但大家都記住要量力而為。
2. 寶雲道中途設有洗手間，非常方便。
3. 南子午石係歷史古蹟，大家記住唔好破壞，眼看手勿動。
4. 記住保持環境清潔，自己垃圾自己帶走，絕對唔可以破壞大自然環境。
前往南子午石方法
1. 最輕鬆：乘坐15號巴士，喺港安醫院站落車，全程平路，沿寶雲道健身徑步行約20分鐘。
2. 喺灣仔其實有唔少山路，可以上到去寶雲道健身徑，大部份人會經由石水渠街花園對面嘅山路前往寶雲道，沿寶雲道健身徑步行約20分鐘。
寶雲道健身徑
南子午石位於香港島嘅寶雲道健身徑內，健身徑全長三公里，沿途平坦易行，可以眺望港九維港景色，吸引市民嚟到散步慢跑，如果幸運嘅，仲可能畀你野生捕獲發哥添！另外，健身徑內亦有唔少健身設施同洗手間，非常方便！
姻緣石
一場嚟到寶雲道，就順便睇埋另一個景點：姻緣石啦！
香港子午線
如果大家有讀過地理，相信都知道喺英國嘅格林威治天文台，有一條無形嘅本初子午線，喺呢條本初子午線向東有12個時區，向西亦有12個時區，將地球劃成24個時區。而當太陽橫穿本初子午線，就係格林威治標準時間嘅正午12點，令全球嘅時區都有統一嘅時間。而喺香港，我哋都有一條香港子午線，標示住香港嘅經度，即東經114°10′。
南子午石
連接住呢條東經114°10′有三座石，分別係尖沙咀天文台內嘅零號三角測量站同第一代北子午石、位於九龍塘筆架山嘅第二代北子午石同位於寶雲道嘅南子午石。同樣地，當太陽橫穿香港子午線，就係香港標準時間嘅正午12點。不過，隨住科技嘅進步，天文台核實時間嘅方法更精準，所以南子午石一度被遺忘。直至近年，由多個專家根據文獻考察，終於搵返南子午石嘅位置。
如果大家都想尋找南子午石，可以參考下面地圖嘅bookmark。大概位置係當你見到下方出現寶雲道臨時遊樂場，另一邊就有一個綠色嘅小閘口，沿閘口後嘅樓梯一直行，中途唔使理任何分叉路，行大概60級樓梯，就會見到一塊石板，行入去就係南子午石喇！
