呢幾日氣溫急降，皮膚較敏感嘅朋友相信已經開始甩皮，唔想成身衫褲都佈滿皮屑，一定要做好保濕！除咗不可或缺嘅保濕用品，其實改變沖涼習慣都可以改善皮膚乾燥情況。
根據香港醫院藥劑師學會，皮膚出現乾燥痕癢嘅問題，撇除患上皮膚病，例如濕疹等外，好可能係因為天氣變化而導致肌膚乾燥痕癢，通常長者嘅情況仲會較為嚴重。
唔想好似「落雪」咁成身皮屑，首先要注意平時沖涼水溫會唔會過高。天氣一凍，大家都會想將水溫調高，沖一個暖笠笠嘅熱水涼，但過熱嘅水會將皮膚上有保護作用嘅油脂層清走，所以記得沖涼時唔好用太熱嘅水，同埋注意沖涼時間。如果浸浴嘅話，就建議可以喺水入面加入具滋潤成分嘅浴球或浸浴用品。
其次，需要避免使用偏鹼性嘅沐浴清潔用品，例如一般嘅肥皂，因為鹼性清潔用品清潔力強，同樣會將皮膚上嘅油脂保護層洗走，導致乾燥情況更加嚴重。
最後，沖完涼當然唔少得搽返啲保濕用品，市面上潤膚產品眾多，有啲更加要過百蚊一枝，對於要 Keep 住搽 Cream 嘅朋友嚟講真係所費不菲。MIRROR 嘅「皮寶寶」Frankie 同 Stanley 就推介 NIVEA 舒敏修復潤膚系列，性價比較高，試上手質地都幾清爽，唔會太「黐笠笠」，都好快吸收，可謂一眾乾肌人士冬天恩物！
Source / 香港醫院藥劑師學會
