【A&M Diary】唔知你哋鍾意睇日出定日落多啲呢？我同M佬都鍾意日落，除咗因為日落期間嘅magic moment之外，更重要係唔洗早起身，而且睇完日落仲會附送埋浪漫嘅夜景添！要數香港最靚嘅日落，又點少得維港呢？M佬今日就帶我玩天星海港遊，坐住世星觀光輪欣賞維港兩岸嘅日落同夜景，真係好浪漫呀！
天星海港遊
喺1999年天星小輪就被《國家地理旅遊雜誌》列為「人生50個必到景點之一」！如果想細味維港，慢慢咁欣賞兩岸景色，天星海港遊就更加適合，一個小時嘅航程，可以不停打卡影相，其實香港真係好靚呀！
尖沙咀天星碼頭
當中環同灣仔嘅天星碼頭重建，位於尖沙咀嘅天星碼頭更有歷史嘅韻味。天星海港遊嘅登船碼頭設於尖沙咀，更有專用嘅候船室同紀念品店。
世星觀光輪
今次為我哋提供服務嘅船叫「世星」，原來世星本身係往返灣仔同紅磡航線，經過改裝之後，成為全港第一艘由柴油發電同電能推動嘅低排放環保渡輪。世星載客量為408人，分為上下兩層，下層保留原本天星小輪嘅面貌，仲設有洗手間；至於上層就分為室內同室外兩部份，室外可以270度全景睇維港景色，而室內就有天幕玻璃，加上梳化軟座，好豪華好舒服架！
黃昏航線
今次我哋坐黃昏航線，黃昏6點啟航，先向維港西岸嘅夕陽出發！左邊係中環嘅商業區，右邊就係全港最高嘅環球貿易廣場，而正前方就係日落嘅景色，真係好靚呀！
