【A&M Diary】新鮮嘅海鮮真係唔駛花巧，加少少蒜蓉清蒸就最好味。食完海鮮再將海鮮嘅精華打埋邊爐，就更徹底啦！今日我哋嚟到旺角嘅尚膳養顏滋補鍋，先食蒸海鮮再打邊爐，一次過滿足兩個願望。餐廳以中式為設計風格，裝潢古色古香，環境相當優雅，而地方闊落，坐得舒服。食材夠新鮮而選擇非常多，呢個晚餐真係夠晒豐富！
尚膳麻辣鍋（小辣）配酸菜白肉鍋
鴛鴦鍋就選擇咗尚膳麻辣鍋配酸菜白肉鍋，一邊辣一邊酸就最夾啦！我哋今日揀咗小辣嘅麻辣鍋，入面勁多香料。欣賞湯底一啲都唔油，唔算太辣而香氣十足，幾適合香港人口味。麻辣鍋本身有鴨血同蜂巢豆腐。鴨血份量算多，非常滑溜；蜂巢豆腐索晒湯汁，夠晒刺激。至於酸菜白肉鍋亦非常足料，微酸夠開胃，湯內已有酸菜、白肉同寬粉，一滾就有得食啦！
蒸蕃薯蜆
打邊爐前，店員會先喺鍋底上加上蒸㗎，開始食蒸海鮮。蕃薯蜆份量多，蒸到開蓋就食得。蕃薯蜆嘅肉身唔算大粒，但就非常鮮甜。
蒜蓉粉絲蒸開邊蝦
蝦預先開邊除咗方便大家食用，更可以令蝦肉更入味。上面放有蒜蓉粉絲，蒜蓉香濃，蝦肉彈牙，當然精華就係啲粉絲啦！
蒜蓉粉絲蒸象拔蚌仔
象拔蚌仔大大隻，蚌肉厚身，非常鮮甜。
蒜蓉粉絲蒸元貝
元貝成隻手掌咁大，新鮮肥美，味道鮮甜。
蒜蓉粉絲蒸蟶子
蟶子長身，索晒蒜蓉香味，令味道更有層次。
牛頸脊
牛頸脊非常新鮮，色質紅潤，雪花紋理清晰，牛肉味特別濃，輕輕一淥就食得。
西班牙黑毛豬
黑毛豬顏色粉嫩，肥瘦均勻，好嫩口，豬肉味香濃！
獅頭鵝腸
清新乾淨，無腥味，爽口彈牙。
四式餃子拼盤
四式餃子有鮮蝦菜肉餃、豬肉韭菜餃、鮮蝦雲吞同鳳城水餃，粒粒都係餐廳自家生製，用料新鮮，粒粒飽滿！
野生竹笙
竹笙係必叫！竹笙係必叫！竹笙係必叫！重要嘅事情要講三次！野生竹笙勁大條又厚身，竹笙索晒湯底精華，無得輸！
三色滑拼
三色滑分別有手打墨魚滑、手打蝦滑同手打鯪魚滑。三種滑都係最鍾意就係餐廳自家製。我哋最鍾意就係手打蝦滑，入面勁多蝦，超彈牙！
