【A&M Diary】以前一年總會去幾次機場，台北、東京、曼谷、倫敦，好掛住你哋呀！但因為疫情嘅關係，冇得去旅行，不如望梅止渴，我哋嚟到機場維修區，同飛機嚟一個近距離嘅接觸，咁就當去咗轉旅行啦！
想去機場維修區影相，大家先要留意一件事。附近係冇停車嘅位置，而且機場管理局嘅職員會經常巡邏，所以想拍喺路邊都唔得。如果想自駕遊？咁就要先將部車泊喺東涌，再轉巴士入嚟喇。另外，不時會有旅遊巴同維修嘅車輛進出，喺馬路影相嘅時候一定要小心。
跑道
香港機場有兩條跑道，分別係北跑道(07L-25R)同南跑道(07R-25L)，長度為3800m。南北跑道嘅安排，主要都係視乎天氣同風向，夏天香港主要吹西南風同西風，所以常用25起降，而冬天多數吹東風同北風，所以較常用07起降。而機場維修區影飛機，最近就係南跑道，所以預上07R降落或25L起飛，就可以影到靚相喇。
疫情前，香港國際機場嘅升降量，係全球數一數二，每日超過1,100架次客貨機升降。如果嗰時嚟影飛機，應該大有收穫。但而家嚟到，就要比少少耐性喇。
