【Now.com生活】恭喜發財！年初一，係出動拜年嘅時候！但唔少人都怕咗姨媽姑姐世叔伯嘅拜年Q&A環節！有時啲問題真係好難招架，心靈很弱的表示唔知佢係真關心，定特登串幾句！所以小編就化身婉君表妹，教你好好應付親戚朋友嘅尷尬問題！
1/ 未帶過另一半返屋企拜年嘅你：你拍拖未呀？
心諗：一睇就知我係單身狗啦，問咩呀問！係要傷人心嘅！／歌都有得你唱啦：「從不喜歡孤單一個，可惜偏偏孤獨一個！」／又話讀書不應談戀愛？點樣即變另一半出嚟？
你應該答：搵到啦，佢係未來啊！未來還未來啊！
分析：咁樣答一方面可以令八卦嘅親戚知難而退，又可以用少少嘅幽默感掩蓋你想串佢嘅心情！大方得體！
2/ 同小編一樣搵得雞碎咁多嘅你：返工搵緊幾錢一個月呀？
心諗：關你咩事？係咪幫手養我先？
你應該答：哈哈搵幾多唔重要呀，我夠使㗎啦，最重要係心中富有呀嘛！
分析：應付對方之餘，又表現得自己夠清高！
3/ 拍咗好耐拖又未結婚嘅你：幾時結婚啫吓？
心諗：哈哈哈哈哈哈，你啲仔女都未結啦，邊輪到我呀！爬頭就唔好啦！
你應該答：畀啲空間我哋，有好消息會通知大家！
分析：啲藝人都係咁答咋嘛！一聽就知呢啲係公關嘢啦，背後唔想話你知幾時，但又唔會得失你，妙！
4/ 結咗婚但又未買到樓嘅你：仲租緊樓呀？幾時買返間屋呀？
心諗：啲樓咁貴點買呀，可能要聽劉鳴煒咁講，睇少幾套戲，去少幾次日本就會買到囉！
你應該答：大家都知呢個土地問題，無咁快解決到，唯有等吓先！
分析：喂，連財政司司長陳茂波都話呢個係土地問題。小市民點會輕易處理到呢個問題呀？將成個社會實況講出嚟，無得追問啦！
其實八卦嘅親戚並唔可怕
只要識答就耍走到佢㗎啦
祝大家狗年唔會神神化化
恭喜恭喜！
插畫：龐穎希
聲演：黃韻菱、黃穎彤
