【now.com生活】天文台預測，未來幾日天氣會逐漸轉涼，下星期一氣溫會降到20°C，有機會係15年來最涼嘅霜降，睇嚟秋天真係殺到埋身！秋天雨水少又乾燥易傷肺，肺一傷就手尾長，所以大家要小心保養身體。Now生活教室請嚟註冊中醫師曹信恩，同大家講下都市人「養身」，今集會教大家秋天要注意嘅事項同潤肺食療。
大家呢排有無起身喉嚨好乾，有幾聲咳？呢啲可能係秋燥嘅徵狀！曹醫師話，喉嚨痛，口乾同埋咳嗽係秋天常見嘅毛病，好多人以為係「熱氣」引致，但其實可能係燥症引起，所以飲涼茶未必可以對症下藥，亂飲仲可能會有反效果。
秋天成日咳同喉嚨乾，都係因為肺部唔夠滋養，影響到呼吸道，所以「秋燥」要「養肺」，而肺同大腸係相表裡，所以如果肺保養得唔好，仲會便秘。
秋天引發咁多病都係因為太乾燥，所以多飲水係非常重要。除咗水，吸收足夠油份亦可以滋潤大腸黏膜，減少便秘。另外，秋天日夜溫差大，所以要著足夠衣物以防感冒。
入秋滋潤養肺湯
材料：沙參10克、麥冬9克、玉竹9克、銀耳9克
製作方法：中火6碗水煮成2碗，早晚1次
以上資料只供參考，如有疑問，請諮詢註冊中醫師為宜。
特別鳴謝：曹信恩中醫師
