【now.com生活】話咁快又到年尾，打工仔又做咗奴隸獸一年。幾難頂都好，咬緊牙關等埋花紅先好拍拍蘿柚走人。轉工第一步就梗係執靚份CV啦，有資深HR人過料，最快1秒就可以foul走你份CV，所以想有面試機會就要留意以下3個要點，唔好中伏喇！
1. Expected Salary
基本上每個職位都有salary range，但有時求職者會FF過晒籠。舉個例，竟然有人覺得Marketing入面最entry level嘅Marketing Assistant有20k！OMG！見到呢啲CV，唔使1秒就即out。
Tips：唔好以為唔寫expected salary就最穩陣，如果HR收到好多合心水嘅 CV，就算你份CV幾靚仔，可能都會因為你無寫expected salary而foul你。
2. 見工相
嗱，唔係唔畀你show off靚樣，但唔該要貼就貼張正規少少嘅相，至少都著suit或者smart casual。有HR人透露，見過有人貼MK自拍照（搵屋企白色牆當背景），高炒又有，低炒又有，真係要幾精彩有幾精彩。
Tips：建議如無必要就唔好貼相喇，外貌呢家野各花入各眼，如果張相留咗壞印象畀人就可能錯失面試機會㗎喇。
3. 空窗期
唔少人覺得空窗期做part time唔使落CV。如果你只係返咗唔係好耐，譬如 1至3個月，就可以唔寫，但如果返超過大半年就最好寫落去。
Tips：如果你每份工之間都有段長嘅空窗期，HR會覺得你一直無人請，就算約你做面試都一定追問原因，與其畀人「盤」，不如清清楚楚寫落CV就最穩陣。
今次分享住BB階嘅CV要項，下次有機會再分享多啲有關HR嘅成魔之路啦，下次見！
