【now.com生活】打工仔一日到黑對住手機電腦，搞到頸梗膊痛，想做運動又無時間？唔緊要！星級導師黃詠詩（Czon）教你3招伸展運動，就算喺office都可以做到！
第一個動作，伸展頸側同埋後頸。分開雙腳，左手捉住凳邊，頭慢慢靠右。右手按住耳仔上方位置以加強伸展。維持5個呼吸之後，面轉向右邊地下，手放後尾枕，每一下呼氣頭微微向下，維持5－10個呼吸，身體轉返中間，再做另一邊。
第二個動作，伸展頸後。先吸氣，呼氣時頭慢慢向下，雙手互扣放後尾枕，手踭指向地，維持5－10個呼吸，完成動作後，手放大脾，慢慢抬頭。
第三個動作，伸展前胸同埋二頭肌。坐到靠邊嘅位置，雙手捉實椅背邊，較柔軟嘅人手可以放椅背上，胸部慢慢向前推，膊頭向後轉動，維持5-10個呼吸，完成後慢慢放鬆背部，逐隻手放低。
除咗以上嘅伸展運動，成日對電腦嘅打工仔，記住每隔1個鐘就要畀雙眼休息5分鐘，先好繼續工作，好好保養自己嘅身體，先可以行更長嘅路，記住每日抽5分鐘伸展喇！
