【Now新聞台】截至早上11時止，1小時內《彭博》用戶關注度上升最多港股，依次為中金公司、美團、騰訊控股、友邦保險及比亞迪股份。
中金及中國銀河澄清合併傳聞，其實連日嚟都有多家內地券商否認傳聞，月初中證監話支持行業整合，培育一流投行，但至今仍未有聲氣，所以投資者就炒住先？但其實落實政策需時，投資者會唔會太心急？
富途證券高級策略師譚智樂認為，內地任何行業都會出現行業整合，因為中央經常鼓勵汰弱留強，提升質量。不過，今次炒作未必單純係行業整合，現時市場相信，短期隨著中美元首即將會晤，外資可能流入資本市場、導致資金追中資金融股等因素相對更有說服力。
佢又相信，內地券商股，尤其部分今個月可以跑贏大市嘅個股，都係憧憬資本市場氣氛，短線可唔可以繼續升，就要睇「習拜會」會面有咩成果。
