【Now新聞台】截至早上11點，1小時內《彭博》用戶關注度上升最多港股，依次為小米集團、中車時代電氣，雅居樂集團、京東健康、 建設銀行。
雖然監管風暴愈演愈烈，但小米股價今個月暫時仍錄得近5%升幅，亦係ATMXJ唯一一隻，今個月仲有得升嘅股份，加上集團喺全球智能手機市場嘅佔有率已超越Apple，晉身全球No.2，刺激股價一度大升逾5%，亦係今日升市最大功臣。
大華繼顯執行董事梁偉源指，依家小米增長最勁嘅市場，都係拉丁美洲、非洲及西歐呢啲低檔手機市場，而呢啲市場喺未來幾個月，好難維持大幅增長。此外，Apple一般喺第3至第4季發布新手機，加上之前有消息指，Apple嘅新iPhone會增產，所以小米嘅排名喺下半年較難維持。
