【Now新聞台】截至早上11時止，1小時內《彭博》用戶關注度上升最多的港股，依次為康希諾生物-B﹑快手、金沙中國、建業地產﹑ 萬科企業。
康希諾嘅新冠疫苗啱啱完成第三期臨床測試，今早股價一度破頂高見388元，升逾6%，但冇耐就倒跌。據《彭博》報道，康希諾嘅新冠疫苗預防有效率僅65.7%，加上內地可能將5000萬重點人群接種疫苗計劃嘅時間順延，拖累康希諾股價。
京華山一國際研究部主管彭偉新指，接種疫苗計劃推遲會令銷售金額延遲入數，康希諾亦無法喺第一時間搶佔市場。雖然股價今日高開，但買盤無以為繼，導致股價自高位回落，增加投資者減磅意慾，佢估計，康希諾股價會持續偏弱。
