【Now新聞台】截至早上11點，一小時內《彭博》用戶關注度上升最多的港股，依次為昆侖能源﹑高鑫零售﹑創科實業 ﹑長城汽車及中石油。
昆能宣布出售管道資產，所得資金部分會用嚟派特別息，刺激股價今早急升，高開逾15%後，升幅一度擴大至近20%，其後升幅收窄，中午收市升近11%，報7.13元。
安山資本資產管理部董事黃志陽指，昆能派特別息，同埋用1.5倍溢價出售管道業務嘅消息，即時提升公司估值外。佢又話，昆能攞180億元出嚟派特息，即有機派逾1元至2元特別股息，如果真係咁派當然皆大歡喜，投資者一定受落，股價就升咗上去。如果純粹想收股息，冇貨在手嘅投資者係可以考慮追入，同埋燃氣股喺冬季係相對硬淨。
