【Viu】MIRROR今日推出最新團歌《Fight Club》mv,為12月團Con注入新能量!隊長Lokman介紹首歌係希望帶出打破規格的態度,而為配合主題,12子展現硬朗新聲線,Lokman錄完被監製Carl叔叔讚:「今次呢個Take好爛仔啊,好正!」姜濤坦言最初感迷惘後表示感激,「係自己未用過嘅聲音,係一個好正嘅體驗。」 Edan笑稱每次同監製Carl叔叔合作都發現新驚喜。Ian亦指新唱腔非常符合歌曲Mood:「硬淨嘅聲音令到歌曲整體聽落去,更具備同人對戰嘅勇悍感覺。」Alton還原錄音室內嘅緊張氣氛:「當時我企喺咪前面,同Carl叔隔住塊玻璃,佢不斷叫我投入啲、奔放啲!」Stanley都覺得錄得好刺激:「用咗好多Energy去唱,Carl叔又一次發掘到我嘅潛能,非常好玩。」Jeremy就話聽返Playback覺得好神奇、好有火。
今次MV亦落足苦功,12子喺廢棄街市同貨櫃場進行實景拍攝,亦係繼電影《12怪盜》之後,再次挑戰大量真功夫打戲。眾人喺拍攝前一日先進行密集式動作訓練。AK話因為大家有跳舞底子,打戲呢方面大家都算拍得順利!Jer更有「一打十」嘅重頭戲,「今次真係實踐到好爽!雖然大家擔心我表情管理,但Action一到我落足100%力同眼神,即刻打破大家嘅顧慮。」Anson Lo就透露自己拍solo打戲時已係凌晨兩、三點:「要打人又要踩人,雖然所有武師都做足安全措施,但每次拍動作場面我都好驚整傷對手。」
拍攝當日狂風暴雨,好多室外景要臨時轉到室內拍,Frankie覺得有啲位拍唔到好可惜,仲話:「其實我仲有好多貨,大家可以搵我拍多啲打戲!」Tiger就話雖然拍攝過程有遺憾,但總算好充實!想感受12子今次有幾狂?快啲入嚟睇實況片呀!
