【Viu】已故樂壇天后梅艷芳母親覃美金（梅媽）8月30日離世，2022年被梅媽登報脫離母子關係嘅長子梅啟明，今日於銅鑼灣一酒樓召開記者會但遲到16分鐘，高調宣稱以兒子身份，拎150萬為母親風光大葬，更聲稱母親怕火，故有意選址將軍澳華人永遠墳場為母親土葬，但一切要靠律師團隊同殯儀館接洽處理。
梅啟明又指責侄仔梅柏麟冇大冇細，又稱母親遺物包括身份證keep晒喺跑馬地警署保險箱冇人可認領，有待死因聆訊，又堅持自己先係親生仔，唔輪到侄仔搞事。佢又透露已向法庭申請禁制令，阻止其他人擅自處理或火化梅媽遺體。更斥侄仔手持嘅遺囑一定係偽造，總之官司會打到底，誓要搶返話事權幫母親辦喪禮。
問到自稱失業嘅佢近期已停止俾生活費予住喺外地嘅老婆Joey，點會有錢辦喪禮？佢高呼：「財來自有方，錢會跌落嚟！」咁係咪會動用梅艷芳信託基金？佢就避談，但堅持自己冇貪錢，一直被指爛賭都係俾人屈。而據酒樓透露，今日梅啟明訂咗3圍打算請傳媒茶敘，每圍$1080但尚未埋單。
另外梅啟明又開名指責KOL潘小文同肥媽言行亂噏，指佢哋同梅媽只得幾年交情扮熟，會保留法律追究權利。想聽呢段訪問，即刻入嚟睇片呀！
