【Viu】同為「沙田友」嘅COLLAR成員Gao、Candy今日以球隊大使身份，現身沙田足球會活動！佢哋指自世界盃後足球知識有急速增長，起碼一定識咩係「越位」！Candy話細個都有同爸爸、哥哥一齊睇比賽，甚至會互射12碼，咁邊個贏多？
Candy任「愛晴當入樽」籃球隊經理人嗰陣，係掌握全隊球員嘅身高體重呢啲秘密數字，Gao搞笑話呢次做大使會濫用職權了解吓，順便幫吓眼搵個靚仔同Candy配對？Candy直言見到Day、Winka借節目《8點直樂VIURIETY》幫佢搵對象都嚇親，Gao笑言再搵唔到就叫Candy去join韓國戀綜《母胎單身戀愛大作戰》，連經理人戴穎都表示支持呀！
Gao最近幫Winka新歌《好好照顧自己》MV擔任導演兼親自操刀剪片，話度橋嗰陣有recall返參加《造星》諗item嘅回憶！事後姊妹們有冇輪住叫佢幫手執導？
提及Day近日喺熱播劇《日落下的彩虹》嘅表現獲讚，Gao搞笑話Day演未婚媽媽勁真實，少見姊妹演出所以好surprise，而Candy則話有被Day、Yoyo、Sica呢段閨蜜情所感動！193噚日透露同Gao、大表哥等拍完新遊戲綜藝，Gao接棒爆料指大贏家係一個好高嘅男仔，唔通係有一米九三咁高嗰個？佢又加碼講咗件拍攝中嘅趣事，就係193突變「159」，Candy笑到彎晒腰！
COLLAR終於再出大碟，一次過晒冷7首新歌，紀錄各人成長！佢哋話張封面相係喺日本街頭拍攝，7女打扮一樣勁似特工，引嚟日本大叔關注！另外，Gao真係決定將「餃子」改名做「水餃」？Candy同媽咪、嫲嫲遊台有冇趣事發生？想知就要去片睇足本訪問啦！
