【Viu】Jacky Fan范卓賢今日孖全新女團N5喺將軍澳出席Now TV嘅「FIFA世界盃2026全球足球熱」宣傳活動！講到踢波，Jacky話細細個都有踢吓，但一次踩波車鏟甩皮後就有陰影唔敢再踢，直到中學先有踢返吓！不過果次受傷最大陰影可能係，當時佢整親喊到收唔到聲，范媽媽就話佢鍾意嘅女同學經過，Jacky聽見立刻收聲，點知係假嘅！佢當時因為生得高就去咗打籃球，點知發現打籃球對長高都幫唔到幾多！
提到喺活動中獻唱世界盃打氣歌《全民開波》，Jacky話之前都有孖ZPOT、TELLER一齊唱，今次發現music break冇人一齊yo真係爭咁啲，大班人一齊開心唱就最正！至於世界盃期間，Jacky話有時間都會陪爸爸一齊睇波，因為兩父子唯一會齊齊睇嘅體育活動就係足球！
至於N5呢日第一次公開表演新歌，大家都話緊張又興奮，隻舞練咗好耐，見到好多fans支持都好開心！幾位靚女同fans玩完足球遊戲，Rose Ma話自己同WingKi喺《足球女將》入面已好有默契，其餘兩位Eva同Midnight冇踢波，不過練完舞都有捉埋一齊練波，但講到會唔會join埋落場踢，兩位就話要再諗諗喎！
不過N5啱啱成團就諗定解散，原來佢哋係一個5年限定女團，佢哋話市面嘅女團冇一啲實驗性質，所以特登諗呢個idea，睇吓5年可以做到咩地步，好似個育成遊戲咁，仲話就算五年後好成功，都會照計劃解散喎，快啲睇足本訪問啦！
