【Viu】組合農夫一連三場嘅《農夫全香港最好笑嘅演唱會》，噚晚喺紅館展開頭場！演唱會甫開始，陸永、C君喺耕地佈置場景中露個頭出嚟，C君話：「全香港最好笑嘅演唱會呀嘛，最好笑係呢度㗎啦。 」陸永接力：「你哋張飛咁平，我哋個升降台係升到呢度。」C君隨即自嘲：「其實係好事嚟，因為我下身唔係好好睇，我老婆都唔睇㗎。」兩個人一開場已經令全場觀眾笑爆嘴！二人隨即「砰」一聲由升降台彈上舞台見大家！
農夫跟住帶嚟一連串Hip Hop Medley，如：《心跳回憶》、《全民皆估》、《娛樂圈殺人事件》，全場觀眾已經企晒起身，勁High！ 之後，玄學天后麥玲玲驚喜化身「Hip Hop Queen」，孖住農夫合唱《風生水起》，仲連埋香港Hip Hop界的重量級代表Novel Fergus、Hip Hop詩人PetPet Shawn，型！ 玲玲姐一唱完就問農夫：「喘氣嘅？」陸永秒回：「梗係啦，你唱一隻！」
去到演唱會中段，農夫宣布2025年已成立公司「農作天下」，陸永笑稱：「呢間公司作為行業老字號，早喺2025年已經成立，公司佔地幾百呎。」二人更笑指準備邀請古天樂、梁朝偉、周潤發簽約加盟，C君一本正經表示：「不過仲未去傾過。」全場繼續笑聲不斷！二人之後落台做開張儀式，仲即場切燒豬！張繼聰接住以「人夫集團」身份驚喜現身，三人著住黑西裝合唱《我連婚都夠膽結》，現場熱血沸騰！
Twins亦驚喜登場同農夫合唱《士多啤梨蘋果橙》！C君笑言：「話咗你哋fan meeting搵我做MC，你要還㗎啦！」 陸永向剛新婚的阿Sa送上恭喜，二人又大讚阿嬌專程飛返香港撐場極有義氣， C君更搞笑話：「你知唔知，我幾多朋友知我哋開紅館特登走呀，重係移民嗰種！」最後Twins送上衷心祝福，演唱會喺全場大合唱《舉高隻手》中圓滿落幕！
