【now.com】昨晚打邊爐，因為太靜所以扭開電視，做緊2015娛樂新聞回顧節目，本來想熄機，但見主持是農夫，點都要捧捧場。節目都不外乎是回顧今年幾單大新聞，幾乎每個傳媒都會重複的那些，又數數今年誰結婚誰生仔誰過身，再講講電視台自己的幾個人氣節目、台慶獎項等等威水史，其實個世界都被縮到幾細，幾乎離不開電視城，但如此狹隘居然又不覺得太難睇，實在要多得農夫整色整水。
若說要回顧2015年娛樂圈，主持人農夫本身就好值得被焦點回顧，節目內都有提到《Do姐去Shopping》，Do姐都說現在農夫好紅。有點唏噓的是，農夫在圈中已浸淫了一段長時間，曾經以音樂人身份走紅過，但近幾年卻做什麼都沒有迴響，出碟冇人知，轉公司冇人理，只有拍劇有些人睇到（例如C君有份演《鬼同你OT》），2015的上半年本已灰到盡頭，下半年卻突然因為做一個旅遊節目的嘉賓，去巴黎做Do姐下把，又突然紅到發紫，你說坐上2015年roller coaster的怎能沒農夫份？
其實農夫好笑又不是要等到《Do姐去Shopping》才知道，跟Do姐的火花也不是突然擦出來，2012年《700萬人的數字》就早有合作，為何直到3年後的「Did Did姐」和「none of your business class」才有反應？但星途跟命運一樣，冇得怨，如果當初Do姐帶去巴黎的是艾粒而不是農夫，就連機會都沒有了。
農夫的路從來不易行，一開始選擇玩rap已是條不歸路，一種音樂在一個地方少人做是有原因的，所以他們早期作品也有唱過各種苦況。《456Wing》陸永自白「我rap到乜都冇做，我rap到戶口跌到雙位數」，是真人真事來的，要朋友過多廿幾蚊去戶口，湊夠100蚊才從櫃員機撳到出來用，所以後來他們主持《撳錢》我一直覺得很有意思。
而他們從來都清楚他們的定位，也看得清這一行的運作，否則好難捱到今時今日，陸永生兩個女仍在做這行。又是早期作品，《ABC君》中C君早已這樣唱，「咪睇我又肥又矮好似一粒馬蹄，其實我生鬼過生鬼多計過矮仔」。但就算揀對路行，還要有正確心態，《娛樂圈殺人事件》這樣寫，「到你發現其實你慣晒，入娛樂界當你貨物賣，你積埋積埋覺得冇古怪，即時certify」，很透徹了。
這樣好的組合，實力可以媲美艾粒，跟貼森小，遠眺軟硬，可是兩次事業高峰，都要有人助力。第一次是麥玲玲，2007年合作一首《風生水起》真正入到屋，得幾年無憂，說好紅又未算，說不紅又連紅館都上過。之後又消失幾年，靠Do姐重新撈起。也許就如他們所唱，一命二運三風水，這一行從來識人好過識字，只是不知以現時娛樂圈的古怪格局，農夫又可以紅到幾時，想起有點唏噓，除了送上衷心祝福，又可以做什麼？
文： 魯連
〈娛樂乜乜乜〉逢星期一至五刊登
將每日的娛樂熱話，以全新角度為大家點評，大膽假設，細心求笑，希望滿足到去到邊度都好鍾意睇娛樂新聞的你。
