【Viu】《寒戰》系列前傳《寒戰 1994》 即將上映，導演梁樂民率領周潤發、郭富城、梁家輝、吳彥祖、劉俊謙、吳慷仁、謝君豪、王丹妮、廖子妤，以及特別加盟的英美神劇星級演員艾頓基倫（Aidan Gillen）等噚日喺全球記者會、首映禮現身，仲有Do姐鄭裕玲做記者會主持 ，陣容超強勁！
曾喺《寒戰》中飾演保安局局長陸明華嘅劉德華，更喺首映禮前酒會驚喜現身支持，同《寒戰》系列三部曲演員re-u！華仔喺台上分享時相當感觸：「轉眼就14年，《寒戰》上映就係我做爸爸嗰一年，所以我好記得。我一直都喺度，大家有幾好，我就有幾好！老闆，下次嗌我！」
發哥就話要多謝團隊，又話好開心可以見到幾代演員！監製江志強喺台上再一次感激幾位元老級影帝周潤發、劉德華、郭富城、梁家輝鼎力相助，並講出開拍前傳嘅初心，係希望能為香港電影打造更多不朽嘅港產經典。 發哥聽完後即對江生重現戲中經典金句：「咁我就下半世咩都唔做，淨係招呼你一個﹗」
首映禮完成後，郭富城、廖子妤話希望大家可以喺社交網幫手宣傳，吳慷仁、王丹妮、劉俊謙亦呼籲要多多支持，Dee哥就話：「睇一次真係唔夠！」發哥就話：「你哋好攰，我都好攰，我聽日要跑步，收工喇！」佢仲話城城要湊女，相當搞笑！
