【Viu】MIRROR今年首支團歌《ATTENTION》出咗喇！12子喺MV當中以牛仔造型登場，勁吸睛！新歌講到喺網絡資訊發達嘅時代下，點樣可以專注自身同自己所鍾意嘅事物！
當被問到MIRROR點樣喺不被外界影響下散發魅力， 隊長Lokman話：「要得到其他人嘅關注，首先要非常專注自己，無論練習或演出，甚至思考嘅時候，就如俗語所講『認真工作嘅男人最有型』，而我最想大家睇到我哋準備演出嘅背後有幾認真同專注！」
副隊長AK就有另一番見解 ：「好多時喺工作上會聽到唔同嘅意見，令自己會覺得混亂。我覺得就係咩都唔好諗，只係諗住出糧日，哈哈！而我希望大家嘅專注點放喺我身上就好，欣賞我嘅作品！」Alton就話： 「係要拒絕無謂嘅消息，我希望將專注力放喺工作之上，善用時間、精力！」
姜濤就覺得要靠運動：「跑步、打籃球先能夠將專注力拉返去生活當中，都唔好喺網上吸收太多負能量。」佢仲希望能夠為大家帶嚟歡樂：「唔應該係我希望得到咩，而係我應該畀你哋點樣嘅感受，咁樣先係藝人真正嘅價值所在。大家睇藝人表演都係想得到快樂！」
Anson Lo覺得自身要有足夠專注先會得到其他人嘅目光，所以會時刻提醒自己要用最佳狀態示人：「入行時間越耐，進修、鍛鍊嘅次數越嚟越密，唱歌、練氣、跑步、健身、寫歌詞，都要不停地練習。」Edan笑指扮女人就可以：「我認為最重要嘅係自身嘅關注，專注喺目標上、搵到值得花心思、精神嘅地方。現今網絡資訊太氾濫，太容易搶走關注，所以要學識專心、唔好被干擾。 」
Ian就分享：「相信好多歌手或演員都想做好音樂、演好戲，呢啲都能夠帶畀大家更深層嘅意義、訊息，都係觀眾更應該留意嘅地方。」 Jeremy就想自己嘅付出得到認可： 「近年一直挑戰唔同的曲風、演出，每次都想做得更好，用心去做好歌手呢一個職業！」Frankie深信只要專注工作上，外界會感受到到佢嘅努力：「我只要喺公開場合就會感到緊張，今年因為舞台劇，無論對台或對觀眾，我已經能表現得比較自然。」 Tiger就指：「清晰自己喜愛、專心去做就會發光發亮！一直有上堂、學唱歌，喺各方面增值自己」 Stanley有感而發：「近年一直鑽研自己嘅演技，比起練習後所得到嘅，更多嘅係經驗或睇法上嘅唔同。今年會有更多作品面世！」
「跳舞擔當」Jer呼籲大家留意MV嘅勁歌熱舞，「《ATTENTION》隻舞都絕非易事，大家可以關注我嘅舞姿！今次難在要豁出去，好在我平時都唔係太怕羞，所以無咩難度！今次有popping嘅部分，練舞時發現咗一個小秘訣令popping更勁，就係喊出嚟，唱現場嘅話應該會幾震撼！」期待！
