【Viu】李龍基今日接受網台訪問，親解同「未婚妻」王青霞（Chris）嘅恩怨情仇，佢坦言事前唔知Chris同老公仲未離婚，但有懷疑過對方生過小朋友，皆因身體上有表徵，但冇開口過問以免傷感情！基哥又話當初對「藍天白雲」發誓要娶Chris並非隨口噏，一直有追問女方意願，點知對方一路採取「拖字訣」，加上Chris父母表明唔鍾意自己，所以冇進一步行動，直至Chris返咗佛山後自覺感情變淡，加上網友爆料先至如夢初醒！
不過，基哥唔認為中咗「天仙局」，亦唔覺得係Chris老公搵「水軍」攻擊自己，仲避談使咗幾多錢喺Chris身上添！基哥仲話以前會放好多錢喺屋企櫃桶任Chris拎，咦？好多即係幾多呢？基哥就神回話：「有十幾張……100蚊紙㗎！」講講吓，基哥又話Chris曾經拎過同老公嘅離婚協議書畀自己睇，之但係會唔會好似Chris啲畫一樣係偽造嘅呢？佢就答唔到喇！
對於網友指基哥由「提款機」變「計算基」，好似「一切都盡在佢掌握中」咁！為咗力證唔係自己告發王青霞，基哥自爆當日係同王青霞一齊被捕，仲要簽保兩年，每三個月報到一次，最後冇事攞返1000蚊保釋金，佢仲話去食餐好！基哥亦有再逐點反駁啲網友，包括7層樓嘅去向，又話要反擊「老屈文化」，甚至請埋律師想告「毒舌網民」添喎！
