【Viu】草蜢巡迴演唱會「RE:GRASSHOPPER」重新啟動，日前舉行咗新加坡站，亦係蔡一傑接受腦部手術後強勢回歸巡唱舞台。傑少狀態大勇喪跳，完全唔似曾經病過！
蔡一智高呼：「今日係蔡一傑強勢回歸舞台嘅日子，大家同我哋一齊Party慶祝！再返嚟非常之唔容易，你哋第一時間買飛，真係抵錫！」傑少就表示以平常心面對：「我覺得非常從容，可能有朋友會擔心我上返舞台嘅情況，但我可以同大家講，同以前冇乜分別，大家唔使擔心我，今晚玩得非常開心。」
完騷後佢哋仲拉隊去當地非常出名嘅大排檔食黑胡椒蟹、燒雞翼等好西，阿智笑稱：「好似食Buffet咁，好開心，我飽到今朝。」傑少又諗起第一次跟師傅梅艷芳出埠演出：「就係嚟新加坡，我有成30年冇去過嗰個大排檔，見返好多新加坡嘅好朋友，個個都好似街坊咁好熱情咁同我哋影相。」草蜢又感激一落機就收到歌迷送上榴蓮蛋糕、斑蘭蛋糕等名物，小編都想食呀！想知更多記得睇實況片呀！
