【Viu】Edan呂爵安噚晚完成《膠戰 RUN FOR YOUR LIVE》之後，凌晨唔瞓都開live同fans傾偈，好寵粉！講到完騷感受，Edan擔心觀眾會怕悶，又話準備時有好大自由度兼且好早就構思男團嘅部份，話係一定要認真表演、有6膠嘅特色！佢又大爆係開騷前一日先決定要露手臂，澄清話自己瘋狂做gym唔係因為要著裙。
Edan有感而發話喺騷上見到爵屎們係感觸又窩心，佢話呢半年都有好多唔同情緒同事情，又指半年前已經想開live，但身邊人都叫佢唔好講太多。
Edan直言：「講到尾係因為恐懼，因為驚會失去、我會影響更多。呢半年我都幾封閉自己，好似好綁手綁腳，好多人keep住指指點點，好似做咩都唔啱，一路都有好多內心嘅struggle。」佢又話自己之前重溫第一次solo演唱，見到自己曾經喺台上講「ED 偶像」，覺得自己當時初生之犢不畏虎，後來先發現自己可能太天真：「原來我口口聲聲話唔驚，原來我都係會驚、唔夠堅定，未真正知自己想要咩、成為點樣嘅人。」Edan坦言過去半年過得並唔開心，佢一直以為自己好理性，但原來都會emo。
Edan強調直播係為爵屎而開，因為爵屎係佢所重視、珍惜：「對你哋、對一直發生咁多年仲喺度嘅你哋，可以打返開我個心，勇敢啲踏出呢步，想直接同你哋分享我經歷嘅事，做返我想做嘅Artist。」Edan亦有講到回應傳媒嘅問題：「我係公眾人物我理解，要有啲嘢畀人講吓，你問我會盡量配合，但如果係一啲網民講嘅嘢，你寫然後標題，你又要我去回應，但真係唔係嗰回事，我都唔知點去處理。我都發覺其實無辦法，我唔想再被呢啲嘢影響。」
