【Viu】「第22屆CASH金帆音樂獎」今日舉行記招，席間公布10項大獎嘅最後入圍名單，兼現場率先頒發8項大獎！其中徐浩獲頒「2023 CASH 最廣泛演出金帆獎 個人最多新作品演出獎『作曲家』」，佢笑指因為今年忙於做騷，所以就少咗產量，最深刻嘅就係年頭MIRROR嘅演唱會，破咗佢自己連續開騷記錄！
徐浩最新為AK監製《Game Of Life》，咁啱AK今日牛一，徐浩指都算係生日禮物之一，私下再約食飯！徐浩又大爆AK廚藝了得，預測老闆喺新團綜《MIRROR Chef》有勝算！
由尹光主唱嘅《Dear Myself》，分別獲5項提名：「最佳男歌手演繹」、「最佳歌曲大獎」、「最佳歌詞」、「最佳編曲」、「最佳旋律」，成入圍大贏家！對連續兩年角逐男歌手獎，光B話好開心，但佢指最睇好係「阿檸」薛晉寧攞「最佳歌詞」！阿檸緊接自爆填《Dear Myself》嗰陣係喺醫院，險被確診患癌，以後係寫緊「遺作」，好彩最後虛驚一場！
近期黃百鳴cover MC張天賦嘅《記憶棉》成熱話，光B話因為啱啱喺加拿大開完騷返港冇留意，不過就知道對方唱得兩嘴，都想遲吓合唱！而阿檸就笑話自己更留意黃百鳴嘅腹肌，係咪想笑死人先？903籃球賽開波在即，阿檸自稱係DJ隊嘅秘密武器，篤爆隊長森美有秘招！
Step何雁詩以《野馬》首次入圍「最佳女歌手演繹」，佢直言係好surprise，有信心攞獎，但都要加埋運氣嘅！嚟緊Step話會推出唔同嘅cover歌，到月尾就會總動員出發去美國，了解更多有關天使綜合症嘅資訊，順道喺當地慶生！
另外，張敬軒憑《隱形遊樂場》獲頒「2023 CASH 最廣泛演出金帆獎 粵語流行作品」，不過軒公就因為要準備澳門騷就未能親身拎獎！想知埋其他入圍名單？依家即刻睇片啦！
