【viu】「劍神」張家朗喺今屆巴黎奧運為香港添一面金牌，前女友、前港隊單車隊代表Vivian馬詠茹，今日孖Larine鄧月平、KOLOR、Rose Ma等，現身啤酒活動頓成焦點！
提起張家朗，Vivian顯得煞有介事，似乎不願提及，問到有冇恭喜對方衛冕金牌？有留意對方有新歡？Vivian都笑話：「唔講呢啲啦！」Vivian之前仲話同家朗係「再見亦是朋友」關係，莫非依家唔再係？
Vivian透露嚟緊會為奧運單車項目賽事喺ViuTV旁述，隔空為港隊運動員打氣加油！不過佢笑話應該唔會好似Ryan蔡俊彥咁旁述得咁生鬼，唔知會唔會爆發到金句！提到有網民喺網上批評運動員表現，Vivian指大家未必知道運動員背後嘅辛酸，希望大家畀多啲愛同鼓勵！
同場Larine笑話自己嘅酒量好「飄忽」，事關同異性飲就千杯不醉，但同同性飲就秒醉，睇嚟Larine個自我保護意識超強！咁唔知佢醉咗會做啲咩？會唔會打畀ex咁猛？Larine聲稱自己單身多年，依家亦feel唔到身邊有追求者，唔通係因為佢近排跟German張文傑學武做打女，所以嚇走晒啲男仔？佢又自爆日前練拳整親脊骨軟骨，真係要小心啲啦！Larine預告8月開戲演劏魚妹，都會有打嘅場面，喺屋企拎真菜刀練動作，確係有料到！小編補多句，Larine有份演出，Viu Original本地原創劇《同居少女諸事卜》就嚟有得睇啦！
