【Viu】Sammi鄭秀文嘅紅館騷臨近尾聲，噚晚第12場請嚟Yoyo岑寧兒做嘉賓，合唱Yoyo嘅作品《追光者》，Sammi仲搞笑咁話：「我終於可以講『我細細個聽你啲歌大』。（點解？）你細細個唱《三人行》，哈哈，我終於可以講呢句啦！」YoYo拉住Sammi話：「你係資深㗎，好犀利呀！」Sammi即搞爛gag回應：「芝心Pizza？」
期間Yoyo感謝Sammi幫自己衝破心理關口：「我曾經唔信邪，喺音樂節表演10首歌，將《追光者》放喺第5首表演，結果一唱完觀眾就紛紛離場，令我自信動搖。我心裏面有一個地方係，就算我唔唱呢首歌都可以繼續表演，我希望呢個地方係香港，所以我一直冇喺香港唱過，今晚好多謝Sammi幫我衝破咗呢個心理關口。」全場觀眾即報以熱烈掌聲幫Yoyo打氣，之後Yoyo選唱Sammi《快樂不快樂》時，亦送飛吻回饋觀眾。
其後Sammi唱《交換溫柔》時，全場觀眾亮起手機燈大合唱，令佢感動爆喊！Encore時，Sammi喺獻唱《盲盒》時獲Fans送上海量薯片，氹得佢好開心咁話：「好開心聽日尾場，之後我可以食薯片啦！唉，我嘅心願真係卑微！」
此外，老闆林建岳博士同囡囡林心兒、何超蓮、何超雲、泳兒、COLLAR成員Marf、芯駖同Candy、林奕匡同太太李靄璣專誠嚟睇騷，仲喺後台VIP遊樂區玩到癲！
