【Viu】天后Sammi鄭秀文嘅《You & Mi 鄭秀文世界巡迴演唱會2023》（Rescheduled ）今晚舉行尾場，請嚟「小鮮肉男神」Jeffrey做嘉賓，合唱《不要驚動愛情》，期間Sammi不斷歌頌Jeffrey又靚仔又高又唱得，又自認「慧眼識Jeffrey」，上年未出第一首歌已經搵對方合唱《致我們的夢想》；Jeffrey即自爆當時收到邀請仲以為睇錯，超搞笑！
Jeffrey以「Sammi姐姐」嚟稱呼天后，Sammi即搞Gag話唔係叫「Sammi姨姨」已經好好，又叫Jeffrey放心叫自己Sammi就ok，零架子呀！身為尾場嘉賓，Jeffrey梗係唔會兩手空空，仲準備咗成篋零食送畀Sammi，除咗薯片，仲有豬肉乾，好有Heart呀！其後Jeffrey獨唱《失約巴黎》，但都搞笑呼籲大家唔好「失約巴黎」，事關正值奧運期間。雖然表情好緊張，但Jeffrey走勻全場唱歌期間都有同Fans握手兼收禮物，好識搞氣氛！
Sammi演唱會當然有靚人靚衫，今晚獻唱「眼淚系列」《哭泣遊戲》、《上一次流淚》同《如何掉眼淚》時，換上貼身薄荷綠長裙，佢行返台中間時自嘲似隻蟹，笑cry！
此外，Sammi好友甘比同兩個囡囡、何超儀同老公陳子聰、蔡一智夫婦、Hillary劉沛蘅都有捧場，最驚喜莫過於見到「洗米嫂」Heidi陳慧玲睇騷，仲超好唱口，首首跟住唱！
