【Viu】鄭伊健《HERE & NOW EKIN IN CONCERT 2024 LONDON》日前喺英國倫敦舉行，變咗「大型K房現場」，慢歌快歌都可以全場大合唱，適逢開騷當日舉行歐洲國家盃賽事，伊健話：「我第一次英國開騷好難得，多謝你哋選擇唔睇波，嚟睇我演唱會！」
期間伊健獻唱多首由Wyman黃偉文填詞嘅作品，唱到《我的歌》時仲強忍淚水，又趁機感激喺台下睇騷嘅Wyman幫自己走出唱歌生涯嘅低潮，仲話：「其實佢寫咗好多畀我，但呢首歌好特別，叫做《新歌》，唔知大家有冇聽過，因為嗰陣時係我低潮，有新作品都未必咁多人知道。當年我睇歌詞問點解，點樣『新嘅我』？嗰陣理解能力有限，但今日攞返首歌出嚟，我同陳光榮講原來首歌唔係講我，係講一個人生！」唱畢《新歌》時再度眼濕濕，場面感人！
其後歌迷狂叫Encore，伊健再度出場唱《動地驚天愛戀過》，見到歌迷全部企起身揮動手機燈，伊健再度眼濕濕兼哽咽，約定觀眾後會有期！騷後Wyman喺社交網站上載同伊健合照，大讚伊健係「最初心」、「最冇被世界改變嘅人」，Respect呀！
