【Viu】鄭伊健事隔3年再踏紅館舞台，舉行9場《HERE & NOW 鄭伊健 2022 演唱會》，獲爸爸、老婆蒙嘉慧拎住小燈牌愛的撐場！甫開騷伊健chok爆升上台，全場歡呼聲不斷！事前佢透露個唱會有「流動電影」概念，配合現場橫跨舞台嘅大螢幕，道出戰爭後人民流離失所，治安環境變差，最後播出現代高樓大廈畫面成對比，視覺、聽覺完全滿足得到！
一口氣連唱幾首經典歌後，伊健指今次開騷比較艱難，又笑話雖然見唔到fans嘅笑容，但就見到大家裏面嘅笑容，然後繼續搞爛gag話：「世界變遷，以前好輕易攞到嘅，依家好難，就好似（台上道具）燒嘢食個爐。」仲搞笑約大家：「完咗個騷北潭涌見！」Cloud雲浩影、朱雋言就擔任嘉賓同伊健jam歌，最後伊健喺encore環節唱《只會因你唱》嗰陣一度感動到眼濕濕，餘下嘅8場都要good show呀！
