【viu】ViuTV新劇《哪一天我們會紅》今日進行開鏡拜神儀式，一眾演員Marf@COLLAR、Day@COLLAR、Shin張毓軒、蘇振維、謝咏欣、Yukki戴玉麒、鄧濤、麥沛東、田啟文、林宣妤等晒冷現身，超熱鬧呀！
Marf開心話對今次嘅演員陣容好滿意，相處融洽勁好玩！再次同《那年盛夏》嘅同學仔Shin、Yukki對戲，Marf指佢哋之間嘅默契再有提升，講到嚟緊同Shin再會合作拍電影《寄了一整個夏天》，佢講笑話咁就開始有少少悶啦！真係畀誠實Marf笑死！
首次拍劇嘅Day以純情眼鏡學生look亮相，就連Shin都忍唔住大讚Day令人眼前一亮！當事人Day就搞笑自嘲：「我自己都嚇親呀簡直係！」又話呢個造型好幫到佢入戲，投入演一位學霸小毒毒！雖然Day話第一次做戲好緊張，但就被Marf意外爆現場有一件事可以comfort到Day！至於蘇振維同Shin呢pair會上演一段「HeHe」情？
憑電影《但願人長久》獲得金像同金馬最佳新演員嘅
謝咏欣都係第一次拍劇，興奮話角色有別與以往要壓抑情緒，可以搞笑、活潑mode，做番自己！繼攞金馬、金像獎新演員後嘅首部作品，謝咏欣坦言多少都有啲壓力！Yukki再同Marf、Shin合作有咩感受？提及佢最近喺Lolly Talk新歌MV嘅突破演出，同女主角錫錫之餘，又同LT逐個成員有親密接觸，Yukki報平安笑指冇收到刀片，但就收到好多慰問message，更被朋友封為「國民男朋友」添！
