【Viu】由「阿正」黃正宜同梁子組成嘅組合虎牙，今日現身coffee festival獻唱，引嚟成班fans圍觀勁熱鬧，阿正仲有收花添！阿正先踢爆梁子臨出場先緊張到手震，梁子不甘示弱反擊，但戰鬥力不足再被爆因鼻竇炎今早急睇醫生，好彩冇影響演出！
重提阿正收花，佢個冧豬樣即刻出晒嚟！唔知換着係男人送，會唔會更開心呢？阿正笑話曾私下送過兩次花畀「愛人」Jeffrey，又鬼馬隔空提示對方情人節就到要識做！講到喺好姊妹Elsie嘅婚禮上，有片為證見Jeffrey主動要求攬攬，梁子一盤冷水倒落阿正度笑話：「嗰個係友誼的擁抱！」果然夠老友！二人專登作咗首sweet歌送畀一對新人，但原來背後係有交換條件，就係要Elsie同Alfred義務幫佢哋喺歐洲拍MV，咁都真係交換得過喎！佢哋仲分享婚禮上最感動嘅moment、邊個喊得最勁、邊個飲醉！
MIRROR演唱會正喺亞博熱唱，阿正透露已約Jeffrey去睇騷，講起「大表波」Stanley副body同Jeremy條纖腰，就已經流晒口水！大表波同Jeffrey二選一，阿正又點揀？
另外，同場仲有四缺一嘅Nowhere Boys，主音Van間咖啡店都有擺booth！佢話開店前都有向阿正諮詢過，大讚對方勁有heart！而佢哋都話遲啲會去睇MIRROR亞博騷撐AK，加碼着埋對方品牌嘅衫，係愛的表現呀！
