【Viu】係人都知AK崇拜日本動漫，今日佢就為歌迷們帶嚟一首日文合唱新歌《白愛》！今次同AK合唱嘅係日本歌手高瀨統也，更合力創作出呢首慘情歌，高瀨表示：「我哋6月開始錄《白愛》，當時AK嚟咗我屋企，係我哋初次見面。AK係我識嘅朋友之中，最鍾意同人交流嘅人。離開屋企之後，我仲帶咗佢去我好鍾意嘅居酒屋呢！」
MV方面，今次AK同高瀨都未有參與角色之一，但二人就構思咗一個同《白愛》一樣嘅傷感愛情故事，AK話：「同高瀨傾歌曲內容時，講到其實愛情除咗男女之外，都可以有唔同形式出現，所以就諗不如以BL情節表達歌曲故事。」
而AK向來熱愛日本文化，但佢其實唔太識日本，所以今次錄音都靠死背，「喺拉闊時唱《どうして（為甚麼）》之前，都有唱過日文歌，但每次都硬背日文，未必明白意思，所以拉闊之前係想認真了解呢個語言，搵咗個日文老師學，不過我日文能力一啲都唔高，因為只係上咗幾堂。」但今次推出日文歌，是咪想打日本市場？佢笑言：「冇諗到咁遠，希望可以透過呢首歌，吸引到日本聽眾認識我。」
