【Viu】教主Anson Lo盧瀚霆今晚推出今年最後一首跳唱歌《ON》，為配合向前衝概念，Anson Lo特別要求排舞師唔好加入任何Signature手勢，「我想舞步有咁快得咁快，有咁密得咁密，有咁辛苦得咁辛苦，因為今次成個舞蹈Pattern、肢體動作，都好似跑緊步，不停衝衝衝嘅感覺，咁跳法係好攰嘅！但襯返首歌。」
今次MV極揼本，喺個大廠搭建地鐵車廂、月台，仲有隧道入面嘅私家車等，難怪拍攝時教主勁興奮，尤其喺車冚上一邊唱歌一邊擺甫士，仲要小心唔好刮花人哋架車，真係難度好高呀！而MV中其中一幕，係喺隧道中拍攝；但講到最有型就梗係要教主揸電單車，喺馬路上風馳電掣，原來教主係冇電單車牌，佢話上車都有一定難度，點解？想睇教主分享更多拍MV嘅難忘事，記得睇足本訪問嘞。
而MV另一個重要場景，就係地鐵車廂，望住呢個車廂廠景，竟然令教主有啲回憶：「對上一次搭公共交通工具，應該係兩年前，其實都幾懷念。我拍幕後花絮時，扮望出地鐵車廂外面，感覺好似啱啱出道嗰排搭地鐵嘅感覺，有機會都想同大家一齊去搭公共交通工具。」
