【Viu】李克勤於中秋節在澳門舉行一連四場《我們的交響樂演唱會》，克勤父母都係澳門人，加埋太太盧淑儀同兩個兒子，仲有外父外母過大海支持，一家人齊齊整整過咗個熱鬧中秋。
頭場當晚， 克勤以《月半小夜曲》同觀眾喺舞台賞月，又全場大合唱《紅日》，克勤話好榮幸入行幾十年好多歌都係廣東歌，而有幾首歌令到唔識廣東話嘅人都去學唱，《紅日》就係其中一首。而當克勤同觀眾講中秋節快樂時，有觀眾大叫，「好靚仔呀！」佢笑話：「邊個講㗎，頭先嗰句咁假嘅嘢？」
喺澳門過中秋，克勤收到好多歌迷、朋友、重有特別嘉賓梁玉瑩(表妹)送月餅， 「成個後台有幾十盒，真係好誇張。做騷我唔敢食咁甜嘢， 但都有食一啖仔應下節。其他留俾工作人員同屋企人食。」克勤又話要特別向酒店致最深的感謝，因為佢之前打波整傷腰，行路都要用拐杖，日日針灸同物理治療，治療師叫佢要瞓硬床，佢喺屋企都係瞓地下，酒店知道後就特別喺床褥下面放塊木板，服務周到搞到克勤感動到眼濕濕咁話喎！佢話：「綵排完我成身散晒返到房，撻落床嗰一刻，我十足條死魚撻落砧板一樣。」
